Í Rokklandi dagsins koma við sögu Jonathan Wilson, Chance the Rapper, Fatboy Slim, Ian Hunter ofl. Við rifjum upp í seinni hlutanum viðtal við bandaríska tónlistarmanninn Jonathan Wilson frá því hann kom hingað til Íslands í nóvember 2013 og hélt tónleika í Kaldalóni í Hörpu. Rás 2 hljóðritaði tónleikana sem voru fluttir í heild sinni í þættinum Konsert síðasta fimmtudag. Rokkland spjallaði við Jonathan á Kex hostel daginn fyrir tónleikana og við heyrum brot af því spjalli og brot af tónleikunum. Ian Hunter fyrrum söngvari Mott The Hoople kemur líka við sögu en hann sem er orðinn 77 ára gamall sendi síðst frá sér plötu í fyrra og þar er eitt lag tileinkað David Bowie og um hann. Hann heitir Chancelor Johnathan Bennett en kallar sig Chance the Rapper og hann fór heim með þrenn Grammy verðlaun þegar Grammy styttum var útdeilt til hinna bestu og efnilegustu á dögunum. Hann var bæði valinn nýliði ársins og platan hans Coloring Book - besta rapp-platan og það án þess að koma út á föstu formi, bara á netinu, Coloring book er fyrsta platan sem kemur eingöngu út rafrænt til að hljóta Grammy verðlaun. Við kynnumst þessum 23 ára gamla náunga frá Chicago í Rokklandi í dag. Svo er það Fatboy Slim sem kom fram á Sónar hátíðinni í Hörpu um síðustu helgi. Rokkland sá hann og heyrði á sviðinu í Silfurbergi en fékk líka tækifæri til að hitta hann og spjalla við hann stutta stund - þeas manninn á bakvið Fatboy Slim, Norman Cook. Við heyrum líka brot úr viðtali sem Rokkland tók við hann á Iceland Airwaves árið 2002 í Laugardalshöll.![]()
↧