Hljómsveitin Hjálmar fagnar um þessar mundir 10 ára afmæli sínu og af því tilefni efndi hljómsveitin til tónleika í Eldborg í Hörpu sem seldist upp á án allra auglýsinga, sem gerist ekki á hverjum degi.
Í tilefni af 10 ára afmælinu hefur Sena gefið út veglega tvöfalda safnplötu með mörgum af bestu lögum Hjálmanna. Platan heitir Skýjaborgin inniheldur samtals 30 lög og þar af þrjú ný.
Það var fyrir áratug að fyrsta breiðskífa Hjálma, Hljóðlega af stað, kom út. Platan vakti talsverða athygli, náði gullsölu og var valin Rokk-plata ársins á Íslensku tónlistarverðlaununum auk þess sem Hjálmar voru „Bjartasta vonin“.
Hljóðversplötur Hjálmanna eru orðnar fimm talsins en auk þess hafa þeir sent frá sér safn áður-óútgefinna laga og eina plötu með finnska tónlistarmanninum Jimi Tenor, Dub of doom.
Fjórða breiðskífa Hjálma „IV“ var tekin upp árið 2009 á Jamaíka með þarlendum listamönnum. Hún sló í gegn, náði platínusölu auk þess að vera tilnefnd til fjölmargra verðlauna á Íslensku tónlistarverðlaununum. Nýjasta plata Hjálma, Órar, kom svo út haustið 2011 og sem oft áður voru Hjálmar tilnefndir til Íslensku tónlistarverðlaunanna, m.a. fyrir „plötu ársins“.
Hjálmar hafa haft hægt um sig undanfarið. Tveir af meðlimum sveitarinnar, þeir Sigurður Guðmundsson og Valdimar Kolbeinn (bassi), hafa verið búsettir erlendis, auk þess sem aðrir meðlimir hafa verið uppteknir við tónleikaferðalög með litla bróður Steina söngvara, Ásgeiri Trausta.
Hjálmarnir hafa þó endrum og eins sent frá sér lög þegar tími hefur gefist til að fara í hljóðver og má þar nefna lagið Skýjaborgin sem og lögin Lof og Tilvonandi vor sem þeir sendu frá sér nýlega.
Þeir Siggi og Kiddi sem lögðu grunninn að Hjálmum í Keflavík á sínum tíma eru gestir Rokklands að þessu sinni og segja okkur frá samstarfinu, vináttunni, hliðarverkefnunum sem Ásgeiri Trausta, Uniimog, JImi Tenor, Erlend Oye ofl.
↧