S. Husky Höskulds kallar hann sig á Facebook og þar sem hann býr í Los Angeles gestur Rokklands. Husky er músíkmaður - græju og takkamaður, upptökumaður og stjóri og hljóðblandari sem fékk Grammy-verðlaun fyrir vinnu við plötu Tom Waits ? Blood Money. Hann hlaut líka Grammy styttu fyrir störf sín fyrir Noruh Jones, en hann vann að fyrstu plötunni hennar Come Away With Me sem gerði hana að stjörnu árið 2002, og hann á fleiri Grammy styttur. Hann segir frá þessu í þættinum. Husky heitir Steinar Höskuldsson, fæddur 1969, alinn upp að mestu í Mosfellsbænum og hefur verið í Ameríku síðan 1991 eða í 25 ár. Hann hefur unnið með Sheryl Crow, Wallflowers og Jakob Dylan, Aimee Mann, Elvis Costello, Mavis Staples, Salomon Burke og Mike Patton söngvara Faith no More og Fantomas svo einhverjir séu nefndir. Husky segir í þættinum að hann trúi á það að hugsa og tala góða hluti til sín, og þegar hann fór til Ameríku á sínum tíma var hann bara með plan A - ekkert plan B. Hann ætlaði að verða góður upptökumaður og hefur fyrir löngu náð að skapa sér sitt eigið sánd og hefur lítinn áhuga á að vinna með fólki sem vill að tónlistin hljómi eins og "vanillubúðingur". Husky er um þessar mundir að hljóðblanda væntanlega plötu íslensku hljómsveitarinnar Fufanu. Í þættinum heyrist músík með þessu fólki sem hann hefur unnið með, af plötum sem hann hefur gert með þessu fólki.
↧